Ína og Gaui komu í mat um daginn og þá elduðum við mjög góðan grænmetisrétt (úr Gestgjafanum).

Ofnbakað grænmeti með hnetusósu
Grænmeti af eigin vali skorið niður og sett í eldfast mót (ég var með gulrætur, kartöflur, sætar kartöflur, lauk og blómkál) sjávarsalt dreift aðeins yfir ásamt smá ólífuolíu
passa að hræra í grænmetinu öðru hvoru.

Hnetusósa:
1 laukur
5 hvítlauksrif
1 paprika
2 chili-aldin grænt og rautt
kóríanderfræ
kumminfræ
sjávarsalt
olía
1L grænmetissoð
1 dós hnetusmjör (sykurlaust). Gummi fann eitt sykurlaust hnetusmjör í Bónus og var það frá euroshopper. Hnetusmjör er auðvitað ekki orkusnautt (finnur varla orkuríkari mat) en hnetur eru hollar þar sem fitan er fjölómettuð.

Saxið lauk, hvítlauk, papriku og chili smátt (við notuðum auðvitað mixerinn ógurlega sem mixaði þetta á 5 sek). Steytið kryddið í mortéli og hitið það síðan í potti með olíu. Þegar kryddið ilmar vel er smátt skornu grænmetinu bætt í, þá hnetusmjöri og soði og látið malla undir loki í 1/2-1 klst.

ATHUGIÐ að þetta er mjög mikil sósa. Við fylltum meðalstórt eldfast mót af grænmeti og var mjög mikill afgangur af sósunni þrátt fyrir að hún var alveg rosalega góð. Við frystum hana og njótum svo auðvitað góðs af síðar.

Lítil hollusta í kvöldmatnum í kvöld. Mér finnst saltkjöt mjög gott og elda það því einu sinni á ári. 'i dag á sprengidaginn auðvitað. Kaupi 1.flokks kjöt og reyni að taka fituna frá eins og ég get. Svo gufusauð Gummi gulrætur, rófur og kartöflur svona til að auka á hollustuna.

Í gær bakaði ég bollur. Prófaði að gamni að reyna að gera þær hollari. Notaði spelthveiti í stað hvíts. Einnig setti ég olífuolíu í stað smjörs. Þær lyftu sér ekkert sérstaklega vel en ég hafði sett ofninn á blástur sem ég hefði ekki átt að gera. Kannski hefðu þær lyft sér betur við undir og yfirhita. Setti svo sultu á með engum aukasykri en hafði samt alvöru rjóma.
Þetta bragðaðist bara mjög vel. Ekkert síðra en hinar óhollari.

Í kvöldmatinn eldaði ég líka bollur en þær voru indverskar.
1 laukur
2 hvítlauksrif
Hökkuð í matvinnsluvél eða saxað smátt og blandað saman við 600g nautahakk (keypti það í kjötborðinu í Fjarðarkaupum)
1 tsk svartur pipar
1 tsk kanill
1 tsk negull
1 tsk kardimommur
slat
olía
Kryddið sett útí
Mótað í bollur og steikt á pönnu þar til þær hafa brúnast vel.
Tekið af pönnunni og sósan búin til

Sósa
1 laukur
2 hvítlauksrif
2 tsk kóríanderfræ
1 tsk kummin
1 tsk túrmerik
5-6g fersk engiferrót, fínsöxuð
4dl kjötsoð
salt
1-2 tsk tsk hrásykur
1/4 sítróna, safinn
ferskt kóríander
Laukur og hvítlaukur saxað smátt og brúnað á pönnu við vægan hita í 4-5 mínútur. Setjið kryddið út í og steikið áfram við vægan hita í 3-4 mín. Bætið þá kjötbollunum við ásamt soðinu.
Saltið og sykrið og dreypið ögn af sítrónusafa yfir. Sjóða í hálftíma.
Ég bar þetta nú fram með kartöflum og raitu en í gestgjafanum þar sem ég fékk uppskriftina er talað um hrísgrjón, raitu og naanbrauð.

Greinilegt að mín er farin að vinna fulla vinnu. Stefnan er að setja upp matseðil fyrir vikuna hjá fjölskyldunni. Það verður vonandi til þess að ég verði duglegri að setja inn uppskriftir hér.